هەواڵ ‌
زەریف بۆ ئەمریكا: بەرامبەر هەر هەنگاوێك دژی گەلەكەمان بێ وەڵام نابین
وەزیری دەرەوەی ئێران رایگەیاند، ویلایەتە یەكگرتوەكانی ئەمریكا جەنگی ئابوری دژ بە ئێران بەرپاكردوە، دەشڵێت، ئەو جەنگە بۆ ناوچەكە و جیهان و سیستەمی نێودەوڵەتی مەترسیەكی گەورەی هەیە.
محەمەد جەواد زەریف، وەزیری دەرەوەی ئێران ئەمڕۆ دوشەممە لەگەڵ هایكۆ ماس، وەزیری دەرەوە ئەڵمانیا لە تاران كۆبوەوە و دواتر لەمیانی لێدوانێكی رۆژنامەوانیدا رایگەیاند، "بێ وەڵام نابین بەرامبەر هەر هەنگاوێك دژی گەلەكەمان، ئێمە دەستپێكی هیچ جەنگێك نەبوین و دەستپێكیش نابین، بەڵام هەركەسێك جەنگ لە دژمان بەرپا بكات كۆتاییهێنان بە جەنگەكە لە دەستی خۆیدا نامێنێتەوە".لەبارەی كۆبونەوەكەی لەگەڵ ماس، زەریف وتی "گفتوگۆی راشكاوانە و جددیمان لەگەڵ وەزیری دەرەوەی ئەلمانیا ئەنجامداوە، تاران بە مەبەستی پاراستنی رێككەوتنە ئەتۆمیەكە هاوكاری وڵاتانی ئەوروپا دەكات".ئاماژەی بەوەشكرد "ویلایەتە یەكگرتوەكان جەنگی ئابوری دژ بە ئێران و گەلەكەی بەرپاكردوە و ئەو جەنگە مەترسیەكی گەورەیە بۆ سەر ناوچەكە و تەواوی جیهان"، دوپاتیشیكردەوە "هەر لایەنێك هێرشبكاتە سەر وڵاتەكەی، تاران تێكیدەشكێنێت".ئەو وتانە لەكاتێدایە، دوێنێ یەكشەممە زەریف رایگەیاند، "بەرەو كۆتا رۆشتنی مۆڵەتە 60 رۆژیەكەی ئێران بۆ ئەو وڵاتانەی لە رێككەوتنە ئەتۆمپەیكە بەشداربون بێ ئەوەی هیچ دەرەنجامێكی هەبێت واتای ئەوەیە، لە چوارچێوەی رێككەوتنەكەدا لێپێچینەوەی دیكە ئنجامدەدرێت".ئەوەشی خستەڕو، "پێویستە وڵاتانی ئەوروپا پەیوەندیە ئابوریەكانیان لەگەڵ ئێران بگەڕێننەوە دۆخی ئاسایی، چونكە ئەوروپا لە پێگەیەكدا نیە لە چوارچێوەی رێككەوتنە ئەتۆمیەكە یاخود دەرەوەی ئەو چوارچێوەیە رەخنە روبەروی ئێران بكاتەوە".

XENDAN

9 جار خوێندراوه‌ته‌وه‌
10/06/2019