وتار ‌
ئێستا كاتی بەدەنگەوەهاتنی بانگەوازەکەی گوڤەن- ە...
* سەڵاحەدین دەمیرتاش – گرتوخانەی ئەدرنە
وێڕای فشار، هەڕەشە، ساختەكاری، بەندكردن و یاریكردن؛ وێڕای كێبەركێی هەڵبژاردن بەشێوەی نایەكسان، نادادپەروەر، هەدەپە توانی بە 67 پەرلەمانتار بچێتە پەرلەمانەوە. پەرلەمانتاری هەكاری لە هەمانكاتدا هاوسەرۆكی DTK بەڕێز لەیلا گوڤەن، ماوەی 54 ڕۆژە مانی لە خواردن گرتووە. وێڕای ئەوەی بە پەرلەمانتار هەڵبژێردراوە وەك بارمتەیەكی سیاسی لە زیندانی دیاربەكر و بەشێوەیەكی نایاساییانە بەڕێز گوڤەن بەندكراوە، لەپێناوی داواكارییەكی زۆر حەق و ڕەوا جەستەی برسیكردووە.
دواكاری حەق و ئەخلاقی
لە نیسانی 2015 ەوە تا ئێستا تەنها جارێك توانیویەتی براكەی ببینێت، لەو ڕۆژەوە بەڕێز ئۆجەلان نە هەواڵێكی خۆی هەیە و نە بەندكراوەكانی دیكەی ئیمرالی تاكە هەواڵێكیان نەگەیشتووە، بەڕێز لەیلا گوڤەن پێشەنگی بانگەوازێكی زۆر گرنگ دەكات. چالاكیەكی وەك مانگرتن لە خواردن كە بە تەواوی بەرهەڵستییەكی سڤیلی پەیوەست بە ئیرادەیەتی و بەرلە هەموو شتێك ئەو هەڵوێَستەی بەڕێز گوڤەن سەبارەت بە پرسێكە كە بە تەواوی ژیانی خۆی خستۆتە پێشەوە، هەڵوێستێكی بەنرخ و شكۆدارە. ئەم تایبەتمەندییە پێویستە بە تەواوی بزانرێت، ئێمە هیچ كاتێك نامانەوێت هاوڕێیەكمان مافی ژیانی زیانی بەركەوێت. ڕێك بەپێچەوانەوە لەپێناوی ئەوەی داكۆكیمان لە مافی ژیانی هەموو مرۆڤێك كردووە بە هاوڕێكانمانەوە، خەباتی ئاشتی درێژە پێدەدەین. لەبەرئەوە ناتوانین بە فشار مانی خواردن بە كەسێك بگرین، ئەمە ئەخلاقی نییە. ئەوەی دەكەوێتە سەرشانی ئێمە بۆ داكۆكیكردن و پاراستنی هاوڕێكەمان ئەوەیە بە بەهێزی و پێداگرییەوە پشتیوانی لە داوا ڕەواكەی بكەین و بە زوترین كات ئەنجامی داواكەی بەدیبێت. ئەوەی ماوە ئەوەیە داواكارییكەی نە پێچەوانەی یاسا و نە پێچەوانەی ڕەوشت و نە پێچەوانەی سیاسەتیشە. پێَشوازیكردن و بەدیهێنانی داواكەی تا بڵێی ئاسانە و لە ڕوی یاساییەوە داواكارییەكە دەبێت بەدیبێت. 
وێڕای فشاری زۆر
وێڕای ئەوەی بەڕێز گوڤەن ڕۆژ لە دوای ڕۆژ دوچاری مەترسی دەبێتەوە وا دیارە ئەو داواكارییە بۆ ڕۆژەڤبوونی حەقی پێنەدراوە. هۆكاری ئەمەش بێگومان ئەوە نییە كۆمەڵگە بێ هەست بێت، گەلی كورد لەسەروی هەموویانەوە بەشێكی بەرچاوی كۆمەڵگەكەی زۆر گرنگی بە ڕۆڵی ئاشتیخوازانەی بەڕێز ئۆجەلان دەدەن، لە نزیكەوە ئاگادارین بەهۆی ئەوەی ماوەیەكی درێژە هیچ هەواڵێك سەبارەت بە ڕەوشی تەندروستی و سەلامەتی ئۆجەلان نەزانراوە، ئەمەش نیگەرانی زۆری دروستكردووە. بابەتێكی گرنگی وەها و پەیوەست بە ژیانەوە كە نەبۆتە ڕۆژەڤی نیشتیمانی و ڕای گشتی نێودەوڵەتی بەهۆی فشاری زۆری حكومەت، پەلامار و ئابڵۆقەكەیەتی. فشارەكان بە شێوەیەكە تەنانەت دایكانی تەمەن 70-80 ساڵی بەشێوەیەكی نایاسایی لەناو بارەگای پارتدا بۆ ئەوەی ئەو بابەتە نەبێتە ڕۆژەڤ دەستبەسەر دەكەن. 
بە دامەزراوەییكردنی فاشیزم
لە تەمموزی 2015 ەوە تا ئێستا ئەو فشار و ناقانونیە بەردەوامانەی لەژێر ڕەهەندی باری نائاساییدا بوون، ڕێگەی خۆشكرد بۆ ئەوەی كۆمەڵگە بەگشتی پاشەكشەبكات و نیگەران و ترساو بێت. میدیا، داد، ئەكادیمی، بیرۆكراسی، سیاسەت، بەهۆی ئەوەی فشاری ئەوەندە زۆری لەسەر بوو وایكرد ڕق و كاردانەوەی كۆمەڵگا نەبینراو بێت. تەنانەت بۆ كاردانەوەیەكی دیموكراسیانەی بچوك هەوڵدەدرێت لە رێگەی فشاری بێ شوماری دادگا-پۆلیس سەركوتبكرێت. ڕژێمی ئەردۆغان ترس و تۆقاندن بڵاودەكاتەوە و دەتوانێت درێژە بەو تۆقاندنە بدات بەهۆی ئەوەی دەزانێت بەبێ ئەوانە ناتوانێت لەسەرپێ بوەستێت، هەوڵدەدات لە ڕێگەی فشاری بەردەوامەوە كۆمەڵگا نەفەسبڕ و بێ چارە بكات. لە ڕاستیدا دروستكردنی فاشیزم و بە دامەزراوەییكردنی بە شێوەیەكی دیكە بەدینایەت.   
ئاماژەدان بە ڕێگای ڕزگاربوون
ئێستا لەژێر ئەو هەلومەرجە سەختەدا، لە ژینگەیەكی نامومكیندا كە تواناكان  تێیدا كەمن، بە ڕۆژەڤكردنی بانگەواز و هاوارەكەی بەڕێز گوڤەن دەكرێت وەك شتێكی سەخت بیری لێبكرێتەوە. بەڵام ڕەوشەكە بە بڕوای من ڕێك بەپێچەوانەیە. بەڕێز لەیلا گوڤەن لەناو ئەو هەلومەرجە دژوار و بە فشارەدا تەركیزی لەسەر خاڵێك چڕكردۆتەوە بەوەی سەرنج بەلای ڕەوشی بەڕێز ئۆجەلان و ئیمرالی ڕابكێشرێت و ڕێگای دەرچوون لەو فشارە نیشان دەدات. واتە بەڕێز گوڤەن بۆ ئەوەی داواكارییە ڕەواكەی ببێتە ڕۆژەڤ، لەبری ئەوەی چاوەڕێی هەلومەرجی گونجاو بكات، پێویستە زۆر باش تێبگەین و باسیبكەین بەوە خۆی دەیەوێت ئەم بابەتە لە ڕێگەی داواكارییەكەیەوە خەبات بۆ گونجانی هەلومەرج بكات.
...


325 جار خوێندراوه‌ته‌وه‌
01/01/2019